अर्जल केन्द्र रहेको यस वडाका अन्य गाउँहरु घुन्मा,दापार्नै ,काँडा र चाँडा हुन् । यहाँ पुन र बुढा थरका मगर ,कामी , दकाई र गौचन थरका थकाली बसोबास गर्दछन् । १३.९९ वर्गकिलोमिटर क्षेत्रफल रहेको यस वडाको जनसङ्ख्या ७७२ रहेको छ । साविकको रन्मामैकोट गाविसको वडा नं.८ र ९ लाई हालको गाउँपालिकाको वडा नं. ४ कायम गरिएको छ । अधिकांश भूभाग भिरैभिर र जङ्रगल हेको यस वडामा घोरल ,रतुवा ,डाँफे ,मुनाल प्रशस्त मात्रामा पाइन्छन् । यस वडाको सिंगो लेकाली भूभाग ढोरपाटन वन्यजन्तु आरक्षभित्र परेकोले सोही ओगटिएको भूगोल वडाको क्षेत्रफलसँग जोडिएको छैन । यद्यपी ,वडाको स्थानीय अर्थत्रन्त्र र जनजीविका आरक्षित क्षेत्रसँग अन्योन्याश्रित छ ।
वडा नं.४ का प्रमुख पर्यटकीय गन्तव्य र आकर्षणहरु :

लिस्नी गल्छी :- स्थानीय घुन्मालीहरुले दोँसो च्योर्‍या भन्ने गरेको यस गल्छीमा दुई ठूला चट्टानलाई काठको फलेक झैं चिरेको देखिन्छ । गल्छीकै भएर लेकतर्फ गोठालाहरु आउजाउ गर्छन् । गलछी बाटोको एकछेउ भएर बहने सङ्लो खोलाले यसको चमक अझ बढाएको छ । ७०/७५ वर्षअघिसम्म यो बाटो भीटतर्फ नून लिन जाने ढाकरेहरुको चलनचल्तीको बाटो थियो । लिस्नी गल्छी आश्चर्य , अनौठो र बौतुहलपूर्ण छ।

घुन्मा खोला :- पुथा उत्तरगङ्गा गाउँपालिका सयौंको संख्यामा रहेका खोलाहरुमध्ये यो सबैभन्दा कञ्चन र सुकिलो भई बग्ने खोला हो । साउन भदौको भारी वर्षात्मा पनि यो खोला दही पोखाए जस्तै सफाचट्ट सेतो देखिनु नवआगन्तुकको लागि अनौठो छ ।

गुल्जा छहरा :- यस वडाकै सबैभन्दा अग्लो छहरा हो । पारिलो भिरको चट्टानबाट धारा जस्तै झर्ने यो छहरा निकै आकर्षक छ । पुस माघको सुख्खा याममा पनी यो छहरा छङछङ झरिरहेको देखिन्छ ।

रिक्या छहरा :- गुल्जा छहरादेखि माथिल्लो घाँटीमा अवस्थित छ । गुल्जाभन्दा केही सानो छ । गुल्जा र रिक्या दुवै लिस्नी गल्छीको बाटो लेकतर्फ लाग्दा देखिन्छ ।